Музичкото радио Канал 103 вечер од 20 часот во Младинскиот културен центар на два подиума организира целовечерен фестивал „103 Генерации“ со бендови и музичари од Велика Британија, Шведска, Албанија и Македонија, сите со актуелни албумски изданија за 2018 година. Во фоајето на кино „Фросина“, пак, ќе настапат диџеите од Стотројка.
Фестивалот е по повод 27-годишното постоење на Канал 103, а програмата на фестивалот „103 Генерации“, како што наведува МКЦ, е исклучително храбра, напредна, супереклектична и бескомпромисно квалитетна, каква што е и програмската ориентација на радиото.
-Главните адути, поточно хедлајнери на настанот се, несомнено, шведскиот маг на софистицираниот електронски звук „The Field“ и британските психоделични гитар-рок херои „The Oscillation“. Тука е и одличниот дарк/минимал/колд вејв тандем од Тирана „I Tpame I Tvrame“, како и домашните миленици на инди/пост-рок публиката „Susijat“. Сите четири имиња во Скопје ќе ги промовираат своите најнови албумски изданија, објавени во 2018 година, што на целиот настан му дава доза на свежина, актуелност и ексклузивност, соопшти организаторот.
Фестивалот ќе се одржува на два подиума. На главната сцена во „Сала 25 мај“ (поранешна Дансинг сала во МКЦ) четирите бендови ќе настапат во живо, а на втората сцена во фоајето на кино „Фросина“ ќе настапат диџеите на Канал 103: Виолета Качакова, Илина Ангеловска, Ивана Драгшиќ, Мирко Попов и Андреа Салпе.