Ќе следува кривична пријава за возачот на Љупчо Палевски – Палчо, првоосомничен за убиството на 14 годишната Вања Ѓорчевска од Скопје и 74 годишниот велешанец, Панче Жежовски, кажа министерот за внатрешни работи, Оливер Спасовски.
„По се она што го имаме досега потврдено, ме информираа службите дека ќе следува кривична пријава“, рече Спасовски.
Инаку возачот кој го однел Палевски во Турција од Србија, преку Бугарија е Стефан Димковски. За него, обвинителството веќе соопшти дека со автомобил Ланд Ровер го пренел првоосомничениот за убиствата, а датумот на кој го носел е истиот со оној кога МВР соопшти дека петмина се приведени за киднапирањето на Вања.
Адвокатот пак, е задржан во законските рамки, од 24 часа, по што ќе се знае дали ќе има понатамошна постапка за него.
