Музичката компилација „Across the mountains: А Macedonian ambient music compilation“, на која се поместени дела на седум автори на амбиентална музика од Македонија, e издадена за американскиот музички издавач „Silber Records“ во соработка со Македонската етикета „post global recordings“, конципирана и курирана од Тони Димитров.
Компилацијата е резултат на долгогодишна комуникација помеѓу овие две издавачки етикети на повеќе нивоа, на релација САД – Македонија, како обид да се продлабочи и изгради една конкретна музичка сцена. Иницијативата е поттикната, конципирана и курирана од страна на Тони Димитров, чија што креација се и дизајнот и фотографиите на обвивката на изданието, а музиката е мастерирана од страна на сопственикот на „Silber Records Brian John Mitchell“.
Оваа компилација е издадена како 155-то издание на „Silber“ и прво издание на „post global“ од едицијата ‘local’ (чија цел е да ги претстави локалните Македонски артисти кој продуцираат амбиентален и експериментален звук до пошироката интернационална публика), а на неа се поместени автори и проекти кои веќе некое време се присутни на локалната и интернационалната амбиентална сцена како Шерифидан Курт, Димитар Додовски и проектите „Аmplidyne Еffect“, „Fydhws, Airless Project“, „Post Global Trio“ и „Sound_00“.
Изданието официјално се појавува денеска, а ќе може да се набави преку веб страната на „Silber Media“ (www.silbermedia.com/comps/acrossthemountains), нивниот Bandcamp профил или преку официјалните продавници за музика како Spotify.
А.Б.