ВМРО-ДПМНЕ повика да се укине техничката влада, меѓу другото, токму поради ваквите евтини трикови и надмудрувања кои беа очекувани од СДС и Ковачевски, но тој истото го одби, велат од ВМРО-ДПМНЕ откако премиерот Димитар Ковачевски најави можност министерските места на опозицијата да останат празни додека тие не ја поддржат техничката влада.
„Со цел да се постапи државнички и одговорно ВМРО-ДПМНЕ прифати да учествува во техничката влада, без да го гласа техничкиот премиер Џафери од ДУИ. ВМРО-ДПМНЕ останува на истиот став, и имињата за министри и заменици, согласно законот ќе бидат предложени наредната недела. Останува на власта дали ќе одбере да го почитува законот, или истиот ќе го крши, што само ги открива и позадинските намери за загрозување на изборниот процес што е доказ за огромната доза на нервоза кај власта во заминување. Правото не познава предлози за министри, “празно место” како што изјавува Ковачевски“, велат од ВМРО-ДПМНЕ.
Ковачевски пак, претходно повика ВМРО-ДПМНЕ да ја поддржи техничката влада, а доколку не го сторат тоа, нивните места во владата да останат празни се додека не гласаат „за“ владата која од 28 јануари треба да ја предводи собранискиот спикер Џафери.