Исламските милитанти од Боко Харам преоблечени во имами убиле 24 лица и раниле уште неколку други во напад во близина на џамија во североисточната нигериска држава Борно, соопштија денеска воени извори и сведоци.
Како што пренесува агенцијата ФЕНА, напаѓачите вчеравечер со автомобили се довезле во оддалеченото село Књајафа и во локалната џамија го собрале локалноот население, претварајќи се дека се проповедници на исламот.
-Потоа, одеднаш тие отворија оган врз нив, соопшти сведокот Симеон Буба.
Шестгодишниот бунт на оваа милитантна група и неуспехот на претседателот Гудлак Џонатан да го спречи и да ги заштити цивилите се меѓу факторите кои доведоа до победата на опозицискиот кандидат Мухамад Бухари на минатонеделните избори.
Групата која се бори за исламска држава досега има убиено повеќе илјади лица и има грабнато стотици други, иако воената операција против нив, што ја водат Нигерија и соседите Чад, Камерун и Нигер, им нанесе жестоки удари на овие милитанти.
– Луѓето не знаеле дека членови на Боко Харам се дојдени во селото за да ги нападнат бидејќи претходно ги излажале дека се дојдени да проповедаат. Отвориле оган врз нив и притоа убиле многу луѓе, изјави Буба телефонски, додавајќи дека милитантите запалиле и многу куќи.