Познатиот бугарски бизнисмен и поранешен припадник на државната безбедност Алексеј Петров е убиен денескаво Софија.
Петров бил застрелан во населба Драгеловци. Локалните медиуми јавуваат дека жената која била со него е повредена и во тешка состојба е пренесена во болница. Го обезбедувале тројца телохранители и дека се движел по својата вообичаена рута.
Петров подолго време беше припадник на специјалната единица за борба против тероризмот, по што влезе во деловните води. На пошироката јавност и е познат како сопственик на осигурителни компании и основач на осигурителната компанија „Аполо и Болкан“ во деведесеттите години на минатиот век.
Против него беше покренато обвинение за предметот против криминалната група „Октопод“ која се занимаваше со рекет и изнуда, но подоцна беше ослободен од сите обвиненија.
Алексеј Петров бил и советник на претседателот на Државната агенција за национална безбедност во 2008 и 2009 година, а извесно време предавал и на Универзитетот за национална и светска економија во Софија. Тој се кандидираше за претседател во 2011 година, но на изборите освои нешто помалку од еден процент од гласовите.
Петров преживеа атентат во август 2002 година и во 2015 година кога врз него беше фрлена експлозивна направа. Бизнисменот е трет бугарски државјанин поврзан со криминални кругови кој е убиен од почетокот на годинава.
Красимир Каменов беше убиен во мај во Кејптаун, додека Ангел Христов беше пронајден мртов во неговиот дом на 3 јуни.