Премиерите на Србија и на Албанија, Александар Вучиќ и Еди Рама во денешниот телефонски разговор се договорија официјалната посета на албанскиот премиер да биде одложена за 10. ноември.
Во заедничкото соопштение се истакнува дека двајцата премиери се согласиле дека инцидентите на стадионот во Белград на натпреварот меѓу фудбалските репрезентации на Србија и на Албанија по својата суштина биле многу несреќни.
– И понатаму постојат јасни несогласувања за тоа како дошло до инцидентите, не не смееме и нема да дозволиме да ја пропуштиме можноста за средба и да работиме на одржување на регионалната стабилност. Време е да свртиме нова страница во политичките и економските односи меѓу Србија и Албанија, се посочува во заедничкото соопштение.
Вучиќ и Рама истакнаа дека е неопходно да продолжи дијалогот и процесот почнат на 28 август во Берлин, за време на конференцијата за Западен Балкан.