Словенечкиот министер за надворешни работи Карл Ерјавец го отвори Бледскиот стратешки форум, со порака дека целта на овој собир е да се дадат некои одговори во однос на прилагодувањето на новата реалност во светот.
– Потребна ни е прилика и иницијатива да разговараме за новата реалност и идните чекори. Нова реалност се постојаните промени. Глобално се соочуваме со бројни предизвици, некогаш радикални и деструктивни, тероризам, оружја за масовно уништување, а тука се и човековите права, кои се и натаму под знак прашалник, истакна Ерјавец.
Сепак, тој потенцираше дека не сака Форумот да се занимава само со заканите и стравот, туку и со начините за создавање подобра иднина, со вклученост на целата меѓународна заедница, соработка и воздржувања од закани, со почитување на правото и владеењето на правото.
– Земјите членки на ЕУ мораат да бидат пример за почитување на преземените обврски, посочи шефот на словенечката дипломатија.
На Бледскиот стратешки форум, кој се одржува денеска и утре под мотото „Нова реалност“, ќе присуствуваат околу 1.000 високи претставници на Обединети нации, на Европска унија и на НАТО, академици, студенти, претставници на бизнис заедницата од над 70 држави. На Форумот ќе присуствуваат и функционери од регионот, вклучувајќи го и шефот на македонската дипломатија Никола Димитров, министерката за одбрана Радмила Шекеринска и министерот за информатичко општество и администрација Дамјан Манчевски.
Меѓу темите за кои ќе се разговара, ќе бидат промените во светот и предизвиците кои тие ги носат, потребата за силни демократски раководства, положбата на ЕУ во изменетиот свет, за Западен Балкан, човековите права во време на промени, дигиталната дипломатија и друго.
Еден од панелите ќе биде посветен на Западен Балкан и процесот на проширување на ЕУ.