Кремљ соопшти дека ги поддржува обидите на Србија да ги заштити етничките Срби во северно Косово и ги отфрли обвинувањата на Приштина дека Русија поттикнува тензии за да сее хаос на Балканот.
Србите во етнички поделениот град Митровица, во северно Косово, подигнаа нови барикади неколку часа откако Србија соопшти дека ја ставила својата војска во највисока борбена готовност. Косово, со мнозинско албанско население, прогласи независност од Србија во 2008 година со поддршка од Западот, по војната во 1998-99 година во која НАТО интервенираше за да ги заштити етничките Албанци.
Косовскиот министер за внатрешни работи Џељаљ Свечла изјави дека Србија, под влијание на Русија, сака да го дестабилизира Косово, што портпаролот на Кремљ, Дмитриј Песков, го отфрли. „Србија е суверена држава и апсолутно е погрешно во тоа да се бара деструктивното влијание на Русија“, рече Песков.
„Србија е суверена држава и природно е што ги штити правата на Србите кои живеат во близина во такви тешки услови и природно е што силно реагира кога овие права се прекршени“, додаде тој.
„Со многу блиски сојузнички односи, историски и духовни односи со Србија, Русија многу внимателно следи што се случува, како се почитуваат и обезбедуваат правата на Србите“, рече Песков. „И секако, го поддржуваме Белград во акциите што се преземаат“, додаде тој.