Со двојната премиера на најновиот филм од серијалот со Џемс Бонд „Небесен пад“ и на 3Д авантурата „Животот на Пи“ вечер во „Сити мол“ ќе биде отворенo првото кино „Синеплекс“ во Македонија.
Само вечер киносалите со три ноќни проекции ќе бидат отворени за публиката по промотивна цена од 90 денари. По специјална цена билетите во „Синеплекс“ ќе можат да се набават и секој вторник, кој ќе важи за „ден за кино“ во понудата на компанијата. По отворањето, цената на билетот ќе биде различна, во зависност од филмот и проекцијата.
За време на викендот, од 23 до 25-ти овој месец ќе бидат организирани голем број активности. Посетителите на „Синеплекс“ ќе можат да уживаат во забавна програма, 3Д анимација поставена пред самото кино, анимација со кловнови, жонглери, маскоти, танцови двојки и други бројни активности.
Скопскиот „Синеплекс“ има девет сали, најголемата со капацитет од над 330 седишта. Втората по големина има 280 седишта, третата 200, а останатите се со капацитет од околу 100 седишта. Вкупниот број на места во сите сали е 1.465. Седиштата се поставени по стадионски принцип, така што секој гледач ќе има целосен поглед на екранот. Екранот, кој во најголемата сала е 14 на 7,6 метри, е поставен од едниот до другиот крај на ѕидот. Во сите сали има дигитална техника и 3Д технологија. Има седишта за двојки, а поради стадионски поставените седишта, и децата ќе имаат целосен приказ на екранот. За најмалите, како интересна премиера се најавува „Гумениот Тарзан“, со синхронизација на македонски јазик.
Салите ќе можат да се користат и за приватни промоции, ревии, фестивали, за родендени. Семејството на „Синеплекс“ е со долга традиција која се негува во Австрија, Хрватска, Србија, Словенија, Црна Гора и во Италија. Има вкупно 42 кина и 271 киносала.