Децата од згрижувачките семејства денеска го посетија Аква паркот во Скопје во рамки на новиот проект на Министерството за труд и социјална политика „На секое дете му е потребно семејство“. Волонтерите на Црвениот крст беа постојано покрај дечињата, а со нив заедно беше и популарниот пејач Даниел Кајмакоски.
Министерот за труд и социјална политика Диме Спасов, кој ги посети дечињата, најавувајќи го проектот истакна дека згрижувачките семејства се најхуманата, најсоодветната форма која е најблиска до биолошките семејства.
– Во Македонија во моментов има 180 згрижувачки семејства кои се грижат за точно 288 деца без родителска грижа од кои 80 се деца со пречки во развојот, а сите останати се деца без родители и родителска грижа, истакна Спасов.
Тој посочи дека целта на овој проект е преку најразлични активности на центрите за социјална работа преку директна и непосредни контакти со граѓаните да се подигне свеста, но исто така и да се информираат за значењето и можностите кои што ги даваат на згрижувачките семејства.
Сите заинтересирани граѓани кои сакаат да се информираат за згрижувачките семејства ќе можат да го направат тоа на мејлот zgrizuvanje.gov.mk или на бесплатниот број 15505.
Во моментов, како што рече Спасов, има потреба од такви згрижувачки семејстава и образложи дека овие семејства остваруваат паричен надоместок од страна на државата, месечно од 6.500 и 8.000 денари за трошоци за покривање на згрижувањето. Но и доколку не исполнуваат услов за старосна пензија, а биле згрижувачко семејство повеќе од 5 години имаат право, после навршување на 62 години да се стекнат со постојан паричен надоместок од 8.000 денари до крајот на својот живот.