Проблемите на вработени од рудникот „Саса“ во Македонска Каменица ќе бидат разгледани од надлежните институции и од Владата, најавила министерката за труд и социјална политика на синоќешната средба со рудари од „Саса“
Како што соопшти Министерството за труд и социјална политика, Царовска најавила дека во наредниот период редовно ќе контактира со претставници на рударите и оти ќе ги вклучи и останатите надлежни ресори со цел да се најдат соодветни решенија за бројните посочени проблеми.
Средбата иницирана од вработени во „Саса“ поминала во конструктивна атмосфера и биле споделени информации за сите проблеми со кои се соочуваат во нивната работна средина.
На средбата, иницирана од вработени во „Саса“, меѓу позначајните прашања на кои се осврнале рударите е начинот на пресметка на бенефицираниот стаж, за кој сметаат дека е на нивна штета. Тие, исто така, посочиле дека години наназад не им се исплаќа тринаесетта плата. – Рударите нагласија дека согласно договорот за концесија раководството на рудникот треба да вработи уште 200 лица за што постои реална потреба со оглед на обемот на нивната работа. Царовска се обврза дека овие проблеми ќе се разгледаат со сите надлежни институции, но и на ниво на Влада, се вели во соопштението.
На средбата станало збор и за прашањето за здравје и безбедност при работа. Рударите, соопштува ресорното Министерство, информираа дека не се утврдува степенот на загадување во рудникот, оти редовно се игнорираат стандардите за работа при што нивниот живот се става во опасност, како и дека се оневозможува вистински инспекциски надзор врз работата. Исто така, нотирани се повеќе случаи на рудари кои не можат да го остварат правото на инвалидска пензија, затоа што не можат да ја обезбедат потребната документација од работодавачот.
МТСП информира дека вработените во Саса потенцирале оти синдикалното организирање е оневозможено и диригирано од сопствениците. Министерката Царовска рекла дека максимално ќе работи во насока на заштита на работничките права и оти ќе создаде услови за синдикатите слободно да се регистрираат и функционираат, но посочила и оти самите рудари треба да се охрабрат околу синдикалното организирање и да покажат солидарност со обесправените колеги.