Во споредба со минатата година постои значително зголемување на бројот на отворени нови работни места. Наскоро Министерството за труд и социјална политика ќе го презентира прогресот на сите мерки за вработување заклучно со август оваа година, најави денеска министерот Диме Спасов.
– Набрзо ќе го презентираме и прогресот на сите мерки кои што ги реализираме оваа година заклучно со август и ќе направиме споредба со минатата година, но во секој случај постои значително зголемување на бројот на отворени нови работни места и вработувања за невработени лица кои активно бараат работа во текот на оваа година, изјави Спасов.
Последните податоци, според него, во однос на мерката за поттикнување на приватните компании да вработат млади и невработени лица до 29 години за ослободување од плаќање придонеси за 12 месеци со обврска да ги задржат на работа дополнителни 12 месеци покажуваат дека во моментот преку оваа мерка се вработени над 3.150 млади лица. Оваа мерка започна да се спроведува во март оваа година.
Спасов, кој денеска најави оглас за обуки за напредни ИТ вештини за невработени лица, истакна дека преку активните мерки за вработување, кои на годишно ниво ги спроведува МТСП, има голем број вработувања односно над 3.400.