Министерот за труд и социјална политика Спиро Ристовски и директорот на Фондот на пензиското и инвалидското осигурување на Македонија Беким Незири денеска го посетија реконструираниот пензионерски дом „Ѓорче Петров“ во Скопје.
Ристовски информира дека комплетно, пред рокот е завршена реконструкцијата на домот, при што целосно се заменети вратите и прозорците, а на пензионерите им се овозможува подобар престој.
– Во завршна фаза е набавката на грејни тела кои ќе бидат на принцип на електрични палети, a ќе бидат поставени во секој од становите, што беше договорено со пензионерите, рече Ристовски.
Тој најави дека ќе бидат реконструирани и останатите пензионерски домови на територијата на Република Македонија, а ќе се почне со домот во Чаир и во Крива Паланка.
Незири истакна дека задачата што ја добиле од Владата, поточно, иницијативата од премиерот Никола Груевски, Фондот за пензиско и инвалидско осигурување почнал да ја реализира во декември.
– Сменети се над 60 прозорци, прозорците во поткровјето и на балконите. Со ова нема да заврши нашето инвестирање во овој пензионерски дом. Отворен е новиот тендер за набавка на грејни тела и во континуитет ќе ги следиме потребите на пензионерите сместени во овој дом, рече Незири.
Претседателот на Сојузот на здруженија на пензионери на Македонија Драги Аргировски истакна дека тука не било вложено 35 години.