„Празна продавница – Полно срце“ е мотото под кое денеска во организација на Црвениот крст на град Скопје и на Скопје Сити Мол започна хуманитарна акција за донирање на облека за социјално ранливите семејства.
Акцијата која ќе се спроведува до 23 септември, ја поддржа и министерот за труд и социјална политика Диме Спасов, кој и самиот донираше дел од својата облека за оние на кои им е најпотребно.
– Преку оваа акција „Празна продавница- Полно срце“ се овозможува на директен начин граѓаните да ја изразат својата хуманост. Во исто време на брз, ефикасен и достапен начин им се овозможува да ја донираат својата облека која им е вишок и со тоа да им помогнат на оние кои се наоѓаат во тешка состојба. Од тука би сакал да ги повикам сите да се вклучат во оваа акција и да бидат хумани, истакна министерот Спасов.
Волонтерите на Црвениот крст ќе бидат задолжени да ја примаат донираната облека на штандот поставен во трговскиот центар Скопје Сити Мол. Таа ќе биде наменета за сите загрозени семејства од целата држава.
За претставниците на Црвениот крст на Град Скопје и на Скопје Сити Мол успешноста на оваа акција ќе значи дека заедно постигнуваат позитивни промени во нашето опкружување и даваат позитивен пример и поттик на сите граѓани и на правните субјекти во земјава.
Генералниот секртар на Црвениот крст на Град Скопје Сузана Тунева Пауновска се надева дека оваа манифестација ќе стане традиционална и оти ваквиот пример ќе го следат и други организации на Црвениот крст и деловни субјекти. Ова, рече, таа е можност на брз и едноставен начин граѓаните да донираат дел од својата облека и да ја донираат за оние на кои им е најпотребна.