Министерката за труд и социјална политика Мила Царовска и претставници на граѓанските организации, кои беа избрани на јавните конкурси за поддршка на проекти, денеска ги потпишаа договорите за финансиска поддршка.
Средбата, како што информираат од Министерството, беше искористена и за размена на конструктивни предлози за спроведување на проектите, но и за начините за проширување на соработката на здруженијата со државните институции, за што министерката Царовска ја потенцираше својата искрена намера и подготвеност.
Присутните се заблагодарија за отвореноста на Министерството и за нововоспоставените начини на комуникација и соработка на здруженијата со секторите во Министерството.
Потпишаните договори за поддршка на проекти се резултат од јавните конкурси кои беа објавени на веб страницата на МТСП и на МРТ на 18 и 21 јули 2017 година, а вкупниот фонд за поддршка на проекти изнесува 2.400.000,00 денари.
На јавниот конкурс за поддршка на Проект за унапредување на работата на Дневен центар за деца со аутизам Штип, беше избран проектот на Здружението „Отворете ги прозорците”, Скопје.
За поддршка на Проект на здружение за социјална заштита на деца на улица, избран е проектот на “Здружението за заштита на правата на детето”.
На конкурсот за поддршка на Проекти на здруженија за заштита на жртви на семејно насилство за 2017 година, поделен на три специфични цели, избрани се Кризен центар “Надеж” – Скопје, Организација на жени на град Скопје и Националниот совет за родова рамноправност.
На јавниот конкурс за поддршка на Проект за реинтеграција на бездомни лица,избран е – Црвен крст на Република Македонија – Црвен крст на град Скопје и за поддршка на Проект за психо – социјална поддршка на деца во социјален ризик избран е проектот на Здружението на граѓани “ХОПС – Опции за здрав живот, Скопје.