Македонската асоција на новинари (МАН) соопшти дека најостро се спротивставува на одлуката на Апелацискиот суд со која новинарот Томислав Кежаровски е осуден на две години затворска казна.
Според Асоцијацијата, единствено прифатлива е ослободителна одлука.
– МАН смета дека секоја казна за вршење на новинарска работа е излишна, па и оваа за колегата Кежаровски. Ова дотолку повеќе што казната за новинарот, кој пишувал текст е повисока од некои за сторителите за чие дело се пишувало, велат од МАН.
Воедно, се наведува, очекуваат да се поднесе жалба по оваа одлука, а Врховниот суд во најкус можен рок, уште следната недела, да закаже седница на која ќе донесе ослободителна пресуда и ќе го ослободи новинарот Кежаровски од секаква одговорност.
– Со оваа одлука судството ќе покаже дека новинар не може и не смее да одговара за професионално извршување на својата работа, стои во реакцијата на МАН.