Термоблокот „Битола 1“, кој како последица на запалувањето на дел од каблите беше исклучен, по извршената интервенција од страна на стручните служби во РЕК Битола е оспособен за производство на електрична енергија и од вчера е ставен во функција.
Како што соопшти денеска АД „ЕЛЕМ“, вчера околу 17 часот капацитетот е вклучен и синхронизиран во електроенергетскиот систем на Република Македонија.
За време на застојот, целосните потреби од електрична енергија за тарифните потрошувачи во целост биле обезбедени од домашните електроцентрали на АД „ЕЛЕМ“.
Од компанијата информираат и дека се подобрува здравствената состојба на работникот што беше повреден при краткото опожарување за време на рутинска манипулација во шесткиловолтна постројка во ТЕ Битола. Тој е контактибилен и надвор од животна опасност, и се очекува во наредните денови да биде пуштен на домашно лекување.