Тоа што ТЕЦ „Неготино“ стана дел од државната компанија ЕСМ, односно двете друштва се споија, а имотот стана сопственост на АД Електрани, не значи дека ЕСМ се подготвува за продажба, тврди министерот за економија, Крешник Бектеши.
– Не знаеме тоа, но според официјалните документи и стратегијата кои ги носиме како министерство тоа не е предвидено. Предвидено е ЕСМ да ги зајакне своите капацитети со цел да биде стожер на енергетскиот сектор. Додека јас сум министер и член на владата, а воедно додека ДУИ е во влада, ЕСМ нема да се продаде. Нашата политика е дека треба да имаме домашно производство од домашни капацитети. Ако други субјекти имаат други политики нека излезат пред граѓаните да ги презентираат. И јас да не сум министер, ако ДУИ е на власт, тоа нема да се случи – потенцира Бектеши.
Информацијата за спојувањето на двете државни друштва е објавен на Македонска беза.
Според она што го пишува во известувањето од ЕСМ, АД ТЕЦ „Неготино“ е избришана од централниот регистар на 29 февруари годинава, а имотот преминува во сопственост на ЕСМ. Во информацијата се додава дека и основната главнина на ЕСМ е зголемена со издавање 32.311.373 обични акции. Една обична акција има вредност од 1.000 денари.