Стихозбирката „Помеѓу минатото и сегашноста“ на Стефанија Мирковска, ученичка во осмо одделение и збирката раскази „Приказни зад аголот“ на Матеј Спасовски, ученик во седмо одделение, денеска беа промовирани во Домот на култура „Илинден“ во општина Илинден.
Книгите ги промовираше Марта Марковска.
Како што информираат од општина Илинден, Стефанија Мирковска и Матеј Спасовски учествувале на конкурс за необјавена книга поезија и проза распишан од Здружението за наука и култура „Нова“ од Битола, при што Мирковска ја добила наградата Поетска гравитација за млад автор, а Матеј Спасовски наградата Прозна гравитација за млад автор.
Наградите ќе им бидат доделени на меѓународниот поетски фестивал „Поетски синтези“ што ќе се одржи овој месец во Битола.
Во изминатите две години петмина ученици од ООУ „Гоце Делчев“ имаат издадено 6 книги.