Летонката Елена Остапенко се квалификуваше за финалето на „Мастерс“ турнирот во Мајами. Во полуфиналето шампионката од „Ролан Гарос“ за минатата година запиша триумф со 7:6 (1), 6:3 над квалификантката Даниел Колинс (САД).
Дваесет годишната Остапенко се справи со својата соперничка за еден час и 39 минути игра, со што стана најмладата финалистка на турнирот од 2009 година досега, кога 19-годишната Викторија Азаренка триумфираше со титулата.
Во борбата за титула, таа ќе се соочи со претставникот на домаќинот – шампионката од Отвореното првенство на САД, Слоан Стивенс, која ја победи Викторија Азаренка со 3:6, 6:2, 6:1.
Со пласман во финалето, Остапенко сигурно ќе се искачи за една позиција на светската ранглиста и од следниот понеделник ќе биде на четврто место.