Украинскиот претседател Володимир Зеленски денес изјави дека за време на состанокот со американскиот претседател Доналд Трамп, американскиот шеф на државата рекол дека САД ќе работат на обезбедување на Украина со системи за воздушна одбрана.
Според Зеленски, за време на состанокот биле разгледани договорите за ретки минерали, продажба на системи за воздушна одбрана на Украина, како и прекин на огнот, пренесува Укринформ.
„Верувам дека фондот (Инвестициски фонд за реконструкција) и самиот договор за минерални ресурси ни овозможуваат да ги заштитиме идните американски инвестиции. Верувам дека ќе изградиме вистински економски инвестиции. Да ја заштитиме, меѓу другото, нашата земја, нашиот народ со воздушна одбрана. И затоа сме подготвени системите за воздушна одбрана да учествуваат во ова. Му кажав на Трамп колкава количина ѝ е потребна на Украина. Тој одговори дека ќе работи на тоа. Ова не се бесплатни работи. И би сакал да имаме пристап до купување американско оружје“, им рече Зеленски на новинарите.