Властите во Летонија најавија враќање на задолжителната воена служба во услови на зголемени тензии со соседна Русија и конфликтот во Украина.
– Сегашниот воен систем на Летонија достигна својата граница. Во исто време, немаме причина да мислиме дека Русија ќе го промени своето однесување, изјави летонскиот министер за одбрана Артис Пабрикс.
Според него, воениот рок ќе важи само за мажи и ќе стапи на сила следната година.
Летонија го укина регрутирањето неколку години по влезот во НАТО.
Од 2007 година, армијата на оваа земја и членка на Европската унија ја сочинуваат професионални војници и доброволци од Националната гарда кои служат во пешадија за време на викендите и со скратено работно време.
Земјата со помалку од два милиони жители, што граничи со Белорусија и Русија, има само 7.500 активни војници и членови на Националната гарда, поддржани од 1.500 војници на НАТО.
Извор: МИА