Летонските власти денеска соопштија дека „поради прекршувања“ и ја одземале дозволата за емитување на независната руска ТВ станица „Дожд“, која е во егзил во оваа балтичка земја од почетокот на војната во Украина.
Телевизијата „Дожд“ соопшти дека одлуката е „неправедна и апсурдна“.
Летонскиот Национален совет за електронски медиуми во петокот ја казни оваа телевизија со 10.000 евра за емитување на мапа на која се прикажува црноморскиот полуостров Крим, анектиран од Москва, како дел од Русија.
„Каналот ќе престане да се емитува на 8 декември“, јави на Твитер шефот на Наци оналниот совет за електронски медиуми, Иварс Аболинс.
„Летонските закони мора да ги почитуваат сите“, додаде тој на социјалната мрежа.
Летонската агенција ЛЕТА пренесе дека руската телевизиска станица, исто така, е обвинета за поддршка на руската војска и дека не обезбедувала превод на летонски јазик.
На одлуката на летонското регулаторно тело е дозволена жалба.
„Каналот останува на ЈуТјуб (YouTube). Ние продолжуваме да работиме и сметаме дека овие обвинувања се нефер и апсурдни“, соопшти ТВ „Дожд“ на Твитер.
Извор: МИА