Велика Британија е разочарана од одлуката на Европската унија да покрене две нови правни постапки против неа и внимателно ќе ги разгледа документите пред да одговори, изјави денеска портпаролот на британскиот премиер Борис Џонсон.
Тој изјави дека британската Влада е разочарана од потегот на ЕУ и дека внимателно ќе ги разгледа документите и формално ќе одговори во скоро време, пренесуваат британските медиуми.
Портпаролот на британскиот премиер кажа дека „пристапот предложен од ЕУ, што не се разликува од оној на кој инсистираше претходно, ќе го зголеми товарот на бизнисите и граѓаните и ќе значи чекор наназад“.
Претходно денеска Европската комисија покрена постапка против Обединетото Кралство поради кршење на меѓународното право, односно непочитување на важни делови од Протоколот за Северна Ирска.
Во Брисел забележуваат дека британската Влада и покрај повеќекратните повици не успеала да го спроведе договорениот Протокол, т.е. документот со кој се утврдуваат трговските правила за Северна Ирска по Брегзит, пренесуваат британските медиуми.
Извор: МИА