Американскиот претседател Доналд Трамп изјави дека размислува за воведување нови санкции и царини против Русија по новите руски напади врз Украина во текот на ноќта.
„Со оглед на фактот дека Русија во моментов буквално ја „меле“ Украина на бојното поле, сериозно размислувам за широки банкарски санкции, санкции и царини против Русија додека не се постигне прекин на огнот и конечен мировен договор“, напиша Трамп.
Во пораката тој ги повика двете страни да преговараат.
„До Русија и Украина – седнете на маса сега, пред да биде предоцна. Ви благодарам, порача Трамп.
По средбата меѓу Трамп и Зеленски во Белата куќа кон крајот на февруари, која заврши со расправија, односите драстично се влошија. Не беше потпишан договор според кој САД ќе преземат 50% од правата на украинските ретки минерали како компензација за помошта дадена за време на војната, а Трамп набрзо ја суспендираше американската воена помош за Украина. Пред неколку дена престана да испраќа разузнавачки информации во Украина.
Во таква ситуација Зеленски јавно објави дека е подготвен за мировни преговори, но набргу потоа Русија изврши нови масовни напади врз украинската инфраструктура. Трамп сега, по бранот критики и руските офанзиви, и се заканува на Москва со големи санкции и царини доколку не се постигне прекин на огнот и конечен мировен договор.