Портпаролот на иранското Министерство за надворешни работи, Есмаил Багаеи, ја повика Франција да ги почитува човековите права при постапувањето со демонстрантите.
Багаеи пред новинарите ја осуди, како што наведе, насилната реакција на француските безбедносни сили кон протестите. Тој побара заштита на основните човекови права и слободи за време на работничките и студентските протести.
Тој рече дека учесниците на протестите укажуваат на кршења на човековите права кои, како што наведе, „ги заглушиле ушите на светот“. Истовремено порача дека демонстрантите треба да избегнуваат насилство, уништување на јавен и приватен имот, како и напади врз припадниците на безбедносните и полициските сили задолжени за одржување на редот.
Портпаролот на иранското Министерство ги обвини француските власти за двојни стандарди, наведувајќи дека постапувањето на иранските безбедносни сили кон вооружени терористи, кои според неговите зборови биле обучувани од ционистичкиот режим, го нарекуваат кршење на човековите права, додека во Франција демонстрациите се задушуваат со најстроги мерки.
Повикувајќи се на извештаи на француските новински агенции за апсење на повеќе од 2.000 демонстранти и нивно претепување, Багаеи побара истрага за наводите дека безбедносните сили употребиле прекумерна сила.
Протестите започнаа во парискиот регион кон крајот на септември поради недостиг на наставници, преполнети училници и влошени услови во училиштата, а потоа се проширија низ цела Франција.
Француските власти соопштија дека само на 1 октомври биле уапсени 1.949 лица, додека биле повредени 305 полицајци и жандарми.
Францускиот министер за правда Жералд Дарманен изјави дека бројот на уапсените од почетокот на протестите достигнал околу 2.000, при што приближно две третини од нив сè уште се наоѓаат во полициски притвор.