Израелскиот премиер Бенјамин Нетанјаху ја повтори својата поддршка за промена на режимот во Иран, сугерирајќи дека сегашната војна би можела да ги олесни договорите за нормализирање на односите меѓу Израел и арапските држави.
Во интервју за телевизијата Канал 14, Нетанјаху рече дека ја гледа промената на режимот во Техеран од историска перспектива, објави „Тајмс оф Израел“.
„Персискиот цар Кир ги ослободи Евреите, а денес еврејската држава може да ги ослободи Персијците. Не го велам тоа во смисла дека ние го правиме тоа за нив. На крајот на краиштата, тие мора да се заложат за себе, но ние создаваме услови и затоа тоа може да биде значајно“, рече Нетанјаху.
Тој двапати за време на интервјуто рече дека „80 проценти од Иранците ја мразат својата влада“, без да прецизира на што го темели своето тврдење.
Нетанјаху го нарече врховниот лидер на Иран, ајатолахот Али Хамнеи, „современ Хитлер“ и потврди дека Израел планира да уништи „голем број објекти на иранскиот режим“ во својата воена операција.
Нетанјаху изрази верување дека војната претставува пресвртница во регионот на Блискиот Исток и додаде дека на Блискиот Исток ќе се појави реалност каква што не е видена досега.
„Ќе видиме поинаков Блиски Исток, реалност каква што не сме виделе досега. Заканата со која се соочуваме сега е Иран. Или ние или тие“, рече израелскиот премиер, додавајќи дека резултатот од војната ќе биде дополнително отворање на арапскиот свет кон Израел.