Моќниот телескоп на НАСА открил десет огромни црни дупки кои демнат во средиштата на оддалечените галаксии. Откритието, до кое научниците дошле сосема случајно, е резултат на работата на вселенските телескопи кои користат Х зраци.
– Гледавме познати мети преку телескопот и ги забележавме црните дупки во позадината на сликата, изјави Дејвид Александер, професор по физика на Универзитетот Дурам.
Десетте откриени црни дупки се само почеток на истражувањето на опсерваторијата, а научниците очекуваат стотина нови. Со категоризација на секоја како супер-масивна, научниците се надеваат дека подобро ќе ги разберат црните дупки.
Според НАСА, откривањето на супер-масивните црни дупки било клучен дел од сложувалката започната во 1962 година, кога астрономите забележале сјај на Х зраци во позадината на вселената, но не знаеле од каде доаѓало.
Денес, научниците знаат дека овој сјај доаѓа од оддалечените огромни црни дупки, од кои некои имаат маса неколку милиони пати поголема од масата на Сонцето.
Меѓутоа, овие форми на црни дупки се уште се истражуваат.