САД им порачаа на своите сојузници дека Русија оваа година би можела да испрати нуклеарно оружје во вселената, објави Блумберг, повикувајќи се на неименувани извори.
Русија наводно развива технологија која може да уништи сателити со нуклеарно оружје, што би го прекршило Договорот за вселената од 1967 година, пишува порталот. Портпаролите на Белата куќа одбија да го коментираат извештајот на Блумберг.
Претходно, американскиот претседател Џозеф Бајден изјави дека Кремљ развива антисателитско вселенско оружје што не претставува директна закана за човечкиот живот.
Рускиот претседател Владимир Путин, од друга страна, ги отфрли ваквите обвинувања.
„Отсекогаш сме биле категорично против и сега сме против распоредувањето нуклеарно оружје во вселената“, рече Путин.
Тој додаде дека Русија го прави „само она што другите земји, вклучително и САД, го прават во вселената“.