Пратениците во руската Државна дума денеска како „организирано истекување информации“ ги окарактеризираа податоците објавени од весникот „Њујорк тајмс“ за можни испораки на оружје од САД за Украина, пренесе ТАСС.
– Сметаме дека е тоа организирано истекување информации, еден вид испитување на тлото. САД, се разбира, најмногу ги интересира реакцијата на Русија, изјави првиот заменик претседател на парламентарната група на партијата „Единиствена Русија“ и член на комисијата за одбрана во Думата, Франц Клинцевич.
Парламентарецот, исто така, потврди дека Русија „многу добро знае дека САД веќе долго време и испорачуваат вооружување на Украина, а меѓу него и смртоносно“.
– Но, сега, како што се чини, може да станува збор за други величини, забележа тој.
Според ставот на Клинцевич, настаните во југоисточна Украина не се развиваат според американското сценарио. „Така што тие може сосема да го одвртат вентилот. Но, ние треба да реагираме не на истекувањето (информации), туку на реалните активности. И, се разбира, да ја држиме раката врз пулсот на настаните“, смета тој.
Клинцевич, исто така, изрази уверување дека неговата земја и „во иднина ќе биде провоцирана“.
-Целта е директно вовлекување на Русија во конфликтот во Украина, изјави тој.