Претседателот на Европскиот совет, Доналд Туск, денеска ја предупреди Велика Британија дека не сака земјата да остане без спогодба за Брегзит со 27-те членки на ЕУ. Предупредувањето беше упатено по парламентарните избори во Обединетото кралство, на кои конзервативците го загубија своето досегашно апсолутно мнозинство во Парламентот, пренесоа француските медиуми.
-Не знам кога дебатата за Брегзит ќе почне, но знам кога треба да заврши. Направете го максимално можното за да се избегне „no deal“ (немање договор), напиша Турск на својот налог на Твитер.
Очекувањата се дебатата за излезот на Обединетото кралство од ЕУ да почне во неделата од 19 до 25 јуни и да заврши кон крајот на март 2019 година.
-Ставот на Европската Унија за Брегзит и временскиот распоред за преговори се јасни, денеска изјави главниот преговарач на Унијата, Мишел Барние, истакнувајќи дека преговорите за разијдување треба да почнат дури кога Велика Британија ќе биде подготвена за тоа.
-Ајде сите да се фокусираме на постигнување на договорот, рече Барние, пренесоа британските медиуми.
Главниот преговарач на ЕУ ова го порача откако британската премиерка Тереза Меј го загуби мнозинството на вчера оддржаните вонредни парламентарни избори, што внесе поголема неизвесност во преговорите за излез на Велика Британија од ЕУ, напоменуваат британските медиуми.