Швајцарскиот тенисер Рожер Федерер изјави дека се уште не размислува да се повлече од активно играње тенис, а главниот мотив за продолжување на кариерата се настапите на големите турнири.
– Главната мотивација да продолжам со „профи“ играњето произлегува од фактот дека големи турнири се играат на најголемите стадиони. Дефинитивно имам среќа што главно играм на Централниот терен и многу често во ударните термини, изјави Федерер.
Швајцарецот додаде дека во случај тоа да не било така продолжувањето на кариерата би било под знак прашалник.
– Морам да кажам, а тоа е навистина искрено, не знам ќе играв понатаму ако ме ставеа на Теренот 4 секој ден. Тоа би било тешко за мене, бидејќи јас сум играл во толку многу неверојатни и брилијантни терени ширум светот, а сега да играм пред само мал број на луѓе. Тоа би било многу тешко, истакнува вториот светски тениски рекет.
Федерер новата сезона ќе ја почне на 4 јануари со учество на турнирот во Бризбејн, Австралија.