Околу 2.000 членови на „Позитивна Словенија“ на вчерашниот партиски конгрес изгласаа градоначалникот на Љубљана Зоран Јанковиќ да ја смени актуелната премиерка Аленка Братушек на лидерското место.
Со доаѓањето на Јанковиќ на чело на партијата, словенечките медиуми оценуваат дека Словенија би можела да влезе во период на политичка нестабилност, пад на Владата и распишување на вонредни парламентарни избори на есен, една година пред рокот, бидејќи против Јанковиќ беа коалициските партнери на Братушек.
Сите три коалициски партнери соопштија дека нема да соработуваат со „Позитивна Словенија“ предводена од Јанковиќ, политичар кој е под истрага за корупција.
– Не можам да бидам премиер доколку ја немам поддршката од својата партија, изјави Братушек пред гласањето.