Владата на Словенија и претставниците на студентските здруженија во земјата потпишаа документ со кој се регулира работата организирана преку студентските сервиси. Одреден е минималниот надоместок за еден час работа на студентите, а ним, според документот, ќе им се исплаќаат и придонеси за здравствено и за пензиско осигурување, пренесе радио МОФ.
Со ова, минималната студентска плата отсега ќе изнесува 3,8 евра за еден час (4,5 евра во бруто-износ). Работодавците ќе плаќаат 8,85 проценти од бруто-платата на студентите за пензиско осигурување, што е стимулација за компаниите, затоа што овој износ е меѓу најниските што треба да се плаќаат за сите групи работници.
Според словенечкиот премиер Миро Церар, документот кој е потпишан претставува голем чекор напред во регулирањето на привремената работа на студентите и е доказ дека дијалогот меѓу генерациите во земјата е изводлив и успешен.
Владата во Љубљана вчера ги продолжи мерките за стимулирање на компаниите што редовно вработуваат млади луѓе, врз основа на кои за една година работа добиле 2.500 млади луѓе.