Припадници на српската полиција се судрија со вооружени Албанци кои краделе дрвја во атарот на селото Боровац, кое се наоѓа на административната линија со Косово, пренесе Б92.
Најмалку двајца Албанци се ранети на административната линија со Косово во селото Боровац, во вооружен судир со припадниците на полицијата, изјави командантот Братислав Дикиќ.
„Група Албанци со автоматско оружје ја нападна патролата на територија на Србија, во атарот на селото Боровац“, изјави Дикиќ за Бета.
Двајцата ранети Албанци се префрлени во болница во Приштина.
Дикиќ се сомнева дека има уште ранети Албанци кои се кријат во шумите.
„Ако ги пронајдеме вечерва ќе им укажеме медицинска помош“, додаде командантот.
Косовската полиција го потврдила инцидентот не прецизирајќи детали, додека приштинските медиуми пренесува дека четири лица се префрлени во болница.
Според тврдењата на мештаните, вооружена група Албанци, ја поминала административната граница и во атарот на селото Боровац се обидела илегално да сече дрвја.
Припадниците на полицијата ја блокираа административната граница по инцидентот.