Турција потврди дека ќе продолжи со сеизмолошки истражувања со својот брод „Оруч Реис“ во спорните води на источен Медитеран до 4 ноември, што дополнително ќе ги затегне односите со Грција и Кипар.
Грција и Турција, обете членки на НАТО, не успеваат да го надминат спорот околу правото на експлоатација на фосилни горива во источниот Медитеран, во реони што Грција и Кипар ги сметаат за дел од нивниот континентален гребен.
По неодамнешниот самит на ЕУ свикан на барање на Кипар, беше објавено дека ЕУ ќе ја казни Турција ако продолжи да спроведува провокативни операции во регионот за кои право имаат и Грција и Кипар.