Примената на договорот меѓу Косово и Србија, кој е потпишан во Брисел, привремено е одложена и до есен нема да има расформирање на паралелните структури и формирање на нови судови, објави приштинскиот дневен весник „Трибуна“.
Весникот наведува дека привременото одлагање е поради реконструкција на српската Влада, годишните одмори, како и проблемите во Косово со Законот за амнестија и непостигнувањето на договор за енергетика и телекомуникации.
„Трибуна“ наведува дека се очекува претставниците на Европската унија кои посредуваат во дијалогот меѓу Белград и Приштина до 8 август да одлучат дали ќе има средба на техничко ниво пред премиерската средба што е закажана на 28 август.
Весникот наведува дека премиерите на Косово и Србија, Хашим Тачи и Ивица Дачиќ на средбата ќе разговараат за расформирање на паралелените структури во полицијата и во правосудството.