Словенија нема да се обраќа до Европската унија за помош и покрај продлабочувањето на економската криза во земјата, изјави словенечката премиерка Аленка Братушек.
– Активно преземаме мерки за самостојно надминување на кризата, нагласи Братушек.
Според Братушек буџетот, кој денеска ќе биде претставен пред Парламентот е добро избалансиран.
– Не очекувам Европската комисија да побара преразгледување на буџетот. Тоа се само шпекулации, рече словенечката премиерка.
Таа призна дека состојбата на словенечката економија е мошне комплицирана, но додаде дека таа е подобра од првото тримесечие на оваа година.
Еден од најголемите проблеми на Словенија е спорото спроведување на реформите во банкарскиот сектор. Братушек смета дека закрепнувањето на банкарскиот систем во Словенија се уште не започнал, но напомена дека делумно за тоа е виновен Брисел.
Словенија е првата земја во ЕУ, која пред почетокот на реформите на банкарскиот систем беше принудена да спроведува т.н. стрес тест на банките, додаде таа.