Словенија не планира „значително да го намали“ приливот на бегалци во земјата, иако утрово почна да подигнува ограда од бодликава жица на некои делови од границата кон Хрватска, изјави државниот секретар во словенечкото Министерство за внатрешни работи, Боштјан Шефич.
– Овие препреки немаат цел да го спречат пристигнувањето на бегалците во Словенија или значително да го намалат нивниот број… Нивна цел е да се насочи приливот на бегалците кон влезните контролни пунктови, истакна Шефич.
Од средината на минатиот месец од Хрватска во Словенија влегле повеќе од 180.000 бегалци, а голем број се очекуваат во следните денови. Најголем дел од бегалците го продолжуваат патот од Словенија кон Австрија и Германија.