Словенечката премиерка Аленка Братушек поднесе денеска официјално оставка пред претседателот на парламентот Јанко Вебер и побара предвремени избори во следниот месец.
Братушек се откажа од премиерската функција откако градоначалникот на Љубљана и поранешен претседател на владејачката Позитивна Словенија Зоран Јанковиќ ја победи на внатрепартиските избори пред десет дена.
На 29 април таа ја напушти партијата, а по неа партијата ја напуштија 12 луѓе – пратеници, двајца министри и тројца државни секретари.
За оставката Парламентот ќе биде известен на посебна седница в среда или четврток.
Оставката треба да биде потврдена од Парламентот по што во рок од 30 дена претседателот, парламентарни групи или најмалку десет членови на парламентот може да предложат нов премиер, но најверојатно тоа нема да се случи туку ќе бидат одржани предвремени избори.