Русија годинава ќе обезбеди 27 милиони долари за финансирање на руско-српскиот хуманитарен центар во Ниш, што ќе бидат наменети за набавка на потребната техника и опрема, изјави денеска во Белград рускиот министер за вонредни ситуации Владимир Пучков.
Хуманитарниот центар во Ниш официјално почна со работа минатата година, но се уште има нерешени правни прашања за тој да функционира со полн капацитет.
Руско-српскиот хуманитарен центар во Ниш ќе почне да работи со полн капацитет до крајот на годинава, нагласи денеска рускиот министер за вонредни ситуации Владимир Пучков по средбата со српскиот премиер Ивица Дачиќ, пренесува ИТАР-ТАСС.
Центарот треба да биде опремен со летала за гаснење на пожари, техника за деминирање, опрема за спасувачки операции, хуманитарна помош, лекови, облека и храна. Во центарот ќе работат околу 30 службеници.