Денеска почнува примената на договорот за интегрирано управување со граничните премини меѓу Србија и Косово, што беше договорено од премиерите на двете земји Ивица Дачиќ и Хашим Тачи.
Во текот на денот треба да бидат отворени граничните премин Јариње и Мердаре, а до крајот на годината ќе почнат да функционираат и премините Брњак и Бела земја.
Согласно договорот Србите од северниот дел на Косово ќе може и во иднина да користат српски документи и регистарски таблички, нема да биде оданочувана и стоката, што се увезува од Србија во Северно Косово, наведува српскиот весник „Блиц“.
– Очекувам во следните неколку дена да станат јасни конкретните проблеми и наши експертски групи да продолжат со решенија, кои ќе бидат трајни и неутрални во однос на статусот. Тоа е единствен начин Србија да прифати и ги применува договорите, изјави директорот на српската владина канцеларија за Косово Александар Вулин.
Во однос на веќе постоечкиот систем, кој се применува на премините, единствена промена е во тоа дека членовите на косовската и српската полиција ќе бидат сместени во еден објект, поделен од стаклени шалтери, преку кои српските и албанските службеници меѓусебно ќе разменуваат документи.