Олси Рама, братот на албанскиот премиер кој е осомничен дека стои зад инцидентот на фудбалскиот натпревар Србија-Албанија, пристигна денеска во Тирана и демантираше дека е поврзан со тој случај.
– Немам ништо со леталото…не разбирам од каде е таа приказна, изјави Олси Рама по доаѓањето во Тирана.
По инцидентот вчера тој беше приведен на стадионот околу 40 минути, а потоа пуштен. Рама ги оквалификува како „спекулации“ на српски медиуми дека тој го организирал инцидентот и оти управувал со леталото.
– Не сум ниту апсен ниту приведен. Кога се случи инцидентот ситуацијата стана хаотична и полицијата сите ги претресуваше. Им го покажав американскиот пасош и камерата. Тоа траеше неколку минути, тврди Рама кој во Тирана пристигна со делегација на албанската репрезентација. Селекцијата на аеродромот Ринас ја дочекаа неколку министри и неколку илјади навивачи.