Словенечки суд започна нова истрага против поранешниот премиер Јанез Јанша и двајца поранешни директори на државни претпријатија под сомнеж за злоупотреба на службената положба при зделки со недвижен имот.
Истрагата се однесува на штети нанесени на врз двете државни претпријатија во 2005 година, кога Јанша беше словенечки премиер. Тој е осомничен дека преку овие компании прво продал приватно земјиште во местото Трента за над 130.000 евра, а потоа купил стан во Љубљана за 236.000 евра.
Управата за геодетски работи го проценила земјиштето на многу помала сума од цената по која било продадено, додека станот изнесувал многу повеќе од платената сума.
Јанша, кој е лидер на опозициската Словенечка демократска партија (СДС), од крајот на минатиот месец се наоѓа во затвор, каде отслужува двегодишна казна поради земање поткуп од финската компанија „Патриа“ во 2005 за зделка при набавка на блиндирани возила за словенечката армија.