Пожарот кој изби во погонот на фабриката за хемиски производи во Пирот, во кој двајца работници се полесно повредени, не предизвика опасност за животната средина.
-Поради граѓаните од Пирот и околината важно е да се истакне дека нема опасност за животната средина, а проценка на штета наредните денови ќе извршат надлежните служби. Тогаш прецизно ќе се знае и причината за пожарот, наведува компанијата „Тигар“, во чиј состав е погонот.
Благодарение на превентивните мерки и брзата реакција на вработените и противпожарната служба, пожарот за кратко време е локализиран и не е причинета поголема материјална штета.
Од компанијата „Тигар“ очекуваат најдоцна за две недели да се нормализира процесот на производство во фабриката за хемиски производи.
Според зборовите на началникот на приемното одделение во болницата во Пирот, Дејан Величковиќ, еден работник е примен со полесни изгореници на рацете, а друг во состојба на стрес и со висок крвен притисок.
Граѓаните кои што живеат во непосредна близина на фабриката изјавија дека во раните утрински часови слушнале експлозија, по што во воздухот се проширил силен мирис на хемикалии.
Елена Георгиевска