Спасувачките екипи очекуваат подобрување на атмосферските услови, за да можат со хеликоптер да ги евакуираат илјадниците луѓе, кои очекуваат спасување по покривите на поплавените куќи во Србија и Босна и Херцеговина, каде водата на места достигна до вториот кат на зградите.
Властите во двете земји ги опишаа поплавите како најлошите во историјата.
Во Босна и Херцеговина ситуацијата се усложнува поради над 200 свлечишта, кои затрупаа куќи и повредија луѓе. Засега не се соопштува за жртви.
Мисијата на ЕУ во Босна ЕУФОР соопшти дека ниту нејзини припадници, ниту армијата, можат да достигнат до некои населби по копно, а лошата видливост попречува на хеликоптерите да се приземјат.
Според последните податоци на српското МВР, досега во земјата се евакуирани 6.175 лица, 20 се повредени, а еден се смета за исчезнат.
Во спасувачките операции се ангажирани противпожарните служби, специјалните единици за борба против тероризмот, жандармеријата и армијата, специјални автомобили, чамци, цистерни и воени хеликоптери, како и сите ресурси на општинските претпријатија и органите на локалната самоуправа.
Властите ги повикаа сите луѓе кои поседуваат чамци да ги достават за спасувачки операции.