Препорака до сите граѓани пред посетата на домовите во пресрет на божиќните празници да се тестираат или со селф тест, доколку се целосно вакцинирани или со рапид тест за невакцинираните, упатуваат од кипарската Влада, во рамките на новите мерки, што од денеска стапуваат во сила, јави дописничката на МИА од Атина.
За домашните собири за празниците, дозволено е да има најмногу 20 лица, вклучувајќи ги и домаќините и децата.
Од денеска, сите вработени кои се вакцинирани или прележале Ковид-19, за пристигнување на работните места задолжително ќе треба да имаат негативен резултат од ПЦР или рапид тест, што ќе важи седум дена, а исклучок се оние кои примиле трета доза.
Училиштата ќе се отворат на 10 јануари и за сите, за учениците, наставниците, професорите и останатиот персонал, на првиот училиштен ден од второто полугодие задолжителен ќе биде негативен резултат од ПЦР или рапид тест.
Од крајот на јануари се намалува важноста на потврдата за прележан Ковид-19 од шест на три месеци.