Известувачот на Европскиот парламент за Србија, Јелко Кацин денеска изјави дека не му е познато оти постојат некакви нови германски услови за натамошната евроинтеграција на Србија, нагласувајќи дека искрено верува оти и ги нема.
– Не ми се познати никакви нови услови од страна на Германија. Условите ги поставува Европската комисија и сметам дека Србија од своја страна покажа дека е доследна. Ова е непотребно драматизирање, истакна Кацин.
Тој по средбата со српскиот министер без ресор задолжен за евроинтеграции Бранко Ружиќ и со шефот на српскиот преговарачки тим со ЕУ, Тања Мишчевиќ, порача дека Србија треба да верува во своите капацитети, да има самодоверба и да не се прашува секое утро за нови услови.
На прашањето дали е вистина дека првите поглавја кои ќе мораат да бидат отворени и затворени се 23, 24 и 35, кое се однесуваат на Косово, Кацин одговори дека „уште пред една година е договорено преговорите за Косово да бидат неутрални“.
– Не можеме пред да ги отвориме преговорите за што било друго, да го отвориме поглавјето 35 и да расправаме за Косово, додаде Кацин.