Рентгентски снимки, лекарски наоди и фотографии од повреди се дел од поставката во рамки на изложбата „Музеј на насилството“, која минатата недела е отворена во галеријата „Podroom“ на Културниот центар на Белград.
Овој простор неколку недели ќе биде јавен архив на медицинската документација што ја донирале жртвите на различни облици на насилство – семејно, насилство меѓу врсници, институционално или она што се заснива на хомофобија, објави Радио Слободна Европа.
Покрај медицинската граѓа која во еден дел ја приложиле анонимни граѓани, некои експонати се дополнети со фотографии од повреди и со пишани сведочења на жртвите кои ги опишуваат своите трауматични настани.
Тука се и неколку камења со кои хулиганите се пресметувале со полицијата за време на нередите на денот на Парадата на гордоста во 2010 година. Додека шета по галеријата посетителот наидува и на огледало што виси на ѕидот, со испишана порака наместо легенда: „Погледнете се! Дали е ова слика на насилник?“